Ова е гест за почит – вели Јанчев откако Заеви испратија 200 пакети со храна во Општина Кавадарци

by Fokus

Семејството Заеви денес испрати 200 пакети со прехранбени производи како донација за Општина Кавадарци. Пакетите се наоѓаат во Банката за храна за градот и ќе бидат поделени на семејствата во социјален ризик.

-Банката за храна постои веќе две години, а храната донирана од физички лица и компании се пакува и носи до фамилиите кои имаат потреба. Состојбата со вирусот не погоди сите, но добро е што во Кавадарци имаме одлично воспоставен систем и на цела територија на општината, односно и во околните села се носат пакетите со храна и хигиенски производи. Не сме вратиле ниту еден човек кој досега побарал помош од нас. Општина Кавадарци е доста силна, има капацитети, има правни и физички лица кои се солидарни и донираат за потребите на банката. Имаме волонтери кои не добиваат финансиски надоместок за својата работа, а ги има во голем број. Благодарни сме му на градоначалникот Митко Јанчев за поддршката, но и на семејството на Зоран Заев, кое денес ни испрати 200 пакети –изјави Роберто Паризов од Банката за храна во Кавадарци.

И градоначалникот на Кавадарци, Митко Јанчев за ,,Фокус” изјави дека е благодарен за помошта од Заеви.

-Одличен гест, ова е доказ дека секогаш, а посебно во време на пандемија сите мораме да бидеме солидарни. Нека ова биде поттик и за останатите од бизнис секторот, секогаш да бидеме водени од хуманоста. Банката за храна во Кавадарци функционира веќе две години, со срце влеговме во овој проект и секојдневно ја покажуваме грижата за ранливите категории на граѓани. Лани во општината беа поделени околу 30 тони храна, горд сум што немавме гладни семејства. Ме радува и фактот што Заеви се вклучија со своја донација, во интерес на народот, постапката е за пофалба – ни изјави градоначалникот.

Вики Клинчарова

Поврзани новости