Осомничените за смртта на Саздо, наместо за насилство, ќе одговараат за убиство

by fokus 15:02
15:02

Осомничените за смртта на младиот Никола Саздовски ќе одговараат за убиство, а не за насилство. Од Обвинителството денеска информираа дека е направена преквалификација на кривичното дело.

-По преземање на сите дејствија за утврдување на фактите во предметот против трите лица осомничени за кривичното дело извршено на 29 јуни 2018 година при кое почина лицето Н.С., Основното јавно обвинителство Скопје изврши преквалификација на кривичното дело за кое до сега се водеше истражната постапка.

Имено, наместо за кривично дело Насилство од член 386 став 6 во врска со став 3 во врска со став 1 од Кривичниот законик, против тројцата осомничени ќе се води истражна постапка за кривично дело Убиство извршено на свиреп начин од член 123 став 2 точка 1 од Кривичниот законик, информираат од обвинителството.

- Advertisements -

Оттаму додаваат дека ваквата одлука следува откако во текот на истражната постапка биле обезбедени вербални и материјални докази, односно биле испитани повеќе сведоци, бил прибавен обдукцискиот протокол од Институтот за судска медицина, криминалистика и медицинска деонтологија, а особено по изготвеното судскомедицинско вештачење извршено по наредба на јавен обвинител од страна на истиот институт.

-Ова вештачење беше доставено во обвинителството на 16 јули 2018 година и од него неспорно произлегува динамиката на кривично-правниот настан во смисла на видот и карактерот на здобиените повреди кај лицето Н.С., а се утврдува и причинскопоследичната врска на нанесените повреди и нивното влијание на смртниот исход.

Одлуката за преквалификација на кривичното дело можеше да се донесе само откако јавното обвинителство ги обезбеди сите релевантни докази, меѓу кои и судско медицинското вештачење, и откако ги утврди фактите кои произлегуваат од тие докази.

Истражната постапка против тројцата осомничени ќе продолжи за кривичното дело убиство. Пред да биде донесена јавно-обвинителската одлука, двајцата осомничени кои се наоѓаат во притвор во Затворот Скопје ќе бидат доведени пред надлежен јавен обвинител за да дадат своја одбрана за ова кривично дело, информираат од обвинителството.

Од јавното обвинителство информираат и дека за третиот осомничен ќе биде распишана домашна и меѓународна потерница.

-Воедно, надлежен јавен обвинител во текот на истражната постапка, продолжува да презема и други истражни дејствија, меѓу кои ќе издаде и наредба за медицинско психијатриско вештачење на двајцата осомничени, стои во соопштението на обвинителството.

Поврзани новости