ОМД побара од Трамп да ги укине визите за Македонија

by fokus

Во име на македонските Американци, Обединетата македонска дијаспора (ОМД) преку телеграма до Доналд Трамп изрази искрени честитки за историската победа на изборите за 45-ти претседател на Соединетите Американски Држави.

-Половина милион Американци имаат македонско потекло. Охајо, Мичиген, Илионис, Индијана, Пенсилванија, Њу Јорк и Њу Џерси се дом на значителен број на македонско-американски заедници. Се надеваме и очекуваме соработка со Вас, г-дине Трамп, со идниот потпретседател Мајк Пенц и Вашата администрација во целост со цел проширување и продлабочување на врските помеѓу САД и Република Македонија… Се надеваме дека во иднина Македонија ќе биде вклучена во безвизната програма на САД., се вели во телеграмата.

ОМД од Трамп побара и да се заложи за прогласување на преговорите за името за ништовни и влез на Македонија во НАТО.

-Пред 12 години, претседателот Буш ја призна Македонија под нејзиното уставно име и ние длабоко се надеваме дека со Вашата помош и лидерство, Обединетите нации конечно ќе ги прогласат таканаречените напори за „преговори за името” како ништовни и неважечки. Исто така ние имаме голема надеж дека Вие ќе помогнете во обезбедувањето на членство на Македонија во НАТО и ќе поддржите еднакви човечки и верски права и слободи на малцинствата во Грција, вклучувајќи ги Македонците и лицата од македонска православна вера, стои во телеграмата.

Поврзани новости