Охриѓанка фатена на албанско-македонска граница, се подготвува нејзина екстрадиција

by Fokus

Граничната полиција на преминот Тушемиште – Свети Наум, на албанско–македонската граница, уапсила македонска државјанка барана со меѓународна потерница, издадена од норвешките власти.

– Благодарение на соработката на Интерпол Тирана со Интерпол Осло, Норвешка и граничната полиција, уапсена е А.М.(35) жителка на Охрид, Македонија, заради екстрадиција во Норвешка. Службите на граничната полициска станица Тушемиште, на влезот во Република Албанија, при контрола на документите утврдија дека станува збор за лице барано со меѓународна потерница, стои во полициското соопштение.

Се додава дека за охриѓанката била распишана меѓународна потерница поради „семејно насилство и киднапирање“ и оти Интерпол Тирана ја продолжува постапката за нејзина екстрадиција во Норвешка.

На 11-ти месецов на граничниот премин Ќафасан, на албанско-македонската граница кај Струга, при влез на албанска територија, уапсен беше Ф.В. 39 годишен, жител на село Велешта, Струга. Против него  шестиот федерален кривичен суд во Рио де Жанеиро, Бразил, издал налог за апсење за кривично дело „трговија со наркотици“.

Поврзани новости