Од хотел во Неготино започна кариерата на сопругата на Александар Илиќ, кој еден месец пред да почине во интервју раскажуваше за нивната љубов

by fokus

Популарниот музичар Александар Сања Илиќ, познат во јавноста и како Сања Балканика, пред три дена ја изгуби битката со корона вирусот. Авторот на низа на хитови, помеѓу кои и култната “Принцеза” на Дадо Топиќ и Слаѓана Милошевиќ, почина во својата 70-та година на клиника во Србија.

Освен по успешната кариера, тој беше познат во јавноста и како сопруг на актерката и поранешен модел, Злата Петковиќ, која почина на 58-годишна возраст во 2012 година, од мозочен удар.
Злата остана запаметена за постарите генерации по улогата на Марија од серијата ,,Враќање на отпишаните” а зад себе остави низа на улоги во филмови и ТВ серии.

Сепак, она на кое можеби малкумина се сеќаваат е дека таа ја започна својата кариера во 1971 година од популарниот хотел Парк во Неготино. Имено, хотелот беше атракција во цела поранешна Југославија поради авионот-ресторан кој во тоа време беше еден од трите авион – ресторани во светот.

Поради својата уникатност, тој беше место каде се одржуваа разни настани, и во 1971 година таму се одржал изборот за Мис на Југославија, на кој победата ја однела тогаш 17-годишната Злата. Тоа беше почетокот на нејзината кариера, во која Петковиќ успеа да освои голем број на титули на интернационални избори за убавина, како и го доби прекарот Југословенска Мерилин Монро. Истата година ја доби и својата прва филмска улога во филмот ,,Бубашинтер”, а во 1974 година ја освои Југославија со улогата на Марија во ,,Отпишаните”, лик кој и го одбележа целиот живот поради големата популарност.

Само пред еден месец, нејзиниот сопруг Сања Илиќ во интервју за српските медиуми, насловено ,,На мојата Злата и беше поважно семејството од кариерата” се присети на нивната голема љубов, на заедничкиот живот и синот Андреј кој му дал сила да продолжи понатаму.
Неколку недели по интервјуто, тој бил хоспитализиран поради влошена здравствена состојба и бил приклучен на респиратор, но не успеа да ја извојува битката со вирусот.

Вики Клинчарова

Поврзани новости