Транспаренси Интернешнал поднесе кривична пријава за стечајниот управник и стечајната судијка на Фени Индустри. Како што велат од таму добиле веродостојни информации за постоење на неправилности во стечајната постапка на Фени Индустри АД Кавадарци. Кривичната пријава се оснедува на злоупотреба на службената положба и овластување, кривично дело што наводно го сториле стечајниот управник Мирослав Анастасиевски и стечајната судијка Валентина Ѓоргиевска.
Дополнително од Транспаренси Интернешенл велат дека добиле добиле претставки во врска со случајот и од Кунико Ресурси, компанијата во чија сопственост се уште е Фени Индустри. Испратено е писмо до Секретаријатот на Транспаренси Интернешнал во Берлин, како и во канцеларијата во Брисел, каде е наведено дека заменик-претседателот на Владата Кочо Анѓушев, наводно го оркестрирал целиот случај со цел компанијата да заврши кај понудувачот „Глобал Спенаш Опортјунитис ЛТД“, со што тој ќе успее да го спречи влегувањето на компанијата„ Енекод“ во Македонија, а со тоа ќе го заштити и уделот кој на пазарот го има „Енерџи Деливери Солушнс“, компанијата што е во негова сопственост.
Копијата од писмото е испратена до премиерот Зоран Заев, како и до Анѓушев, за кого Транспаренси Интернешнал очекува да се изјасни за наводите.
– Имено, Анастасиевски на 3 јануари 2018 година објавил „Оглас за прибирање на писмени понуди за склучување на договор за преработка на никелова руда“, што содржи недоволно одредени услови врз основа на кои би можел да изврши селекција на понудите и одбирање на најповолната, но содржи услови со кои за одредено правно лице понудувач се создава состојба на предодреденост и му се дава неоправдана предност, објасни претседателката на Организацијата Слаѓана Тасева.
Таа наведе дека потоа врз основа на селективно прифилираниот Оглас е одреден понудувач со кој подоцна е склучен ветен Договор како застапник на Фени Индустри АД Кавадарци.
– Ѓоргиевска, иако согласно Законот за стечај имала обврска да врши надзор над работата на стечајниот управник, постапила спротивно нејзините надлежности и со тоа и таа и Анастасиевски, без при тоа да водат сметка за законските обврски при утврдувањето на идентитетот на втората договорна страна и овозможиле на фирмата „Глобал Спенаш Опортјунитис ЛТД“, регистрирана на Бахамите, да се стекне со нерамноправен Договор што на неа и овозможува значителна имотна корист, а е штетен за стечајниот должник и ги доведува во неповолна положба стечајните доверители, нагласи Тасева.