Нов протест на ЛГБТ-заедницата пред Обвинителството

by Фокус 10:28
10:28

Националната мрежа против хомофобија и трансфобија денеска со почеток од 12:00 часот, ќе организира протест пред просториите на Јавно Обвинителство на кејот од реката Вардар.

Целта на протестот е потенцирање на потребата за ефикасен пристап до правда за сите граѓани на Република Македонија, без оглед на нивните различности. Протестот ќе биде перформативен, со траење од петнаесет минути.

- Advertisements -

На 23.10.2014, во 21:30 часот, група од околу триесет маскирани млади луѓе, молскавично и во стампедо во трк го каменуваа кафе барот Дамар, каде ЛГБТИ Центарот за поддршка – Хелсиншки комитет за човекови права ја прославуваше двегодишнината од своето постоење. Во моментот на настанот, во кафе барот Дамар имаше повеќе од шеесет лица, од кои едно момче и една девојка се наоѓаа надвор од објектот, пред влезната врата на кафе барот. Групата ги нападна со стаклени шишиња и со удари во пределот на главата и телото со што им нанесе телесни повреди.

Ова е шести напад врз ЛГБТИ Центарот и неговите активности во текот на неговото двегодишно функционирање. Со исклучок на нападот врз ЛГБТИ Центарот од 02.03.2013 година, кој беше дел од поголеми протести со меѓуетнички предзнак, за сите други случаи истрагата е се уште во тек.

Поради тоа, НМХТ ги упаќа следните барања до Владата, Министерството за внатрешни работи, Јавното обвинителство и до надлежните судови:

1. Бараме јавна осуда од Премиерот на Владата, министерката за внатрешни работи и министерот за правда за хомофобичното насилство од омраза против ЛГБТИ луѓето во РМ.

2. Бараме брзо разјаснување на случајот, откривање на сторителите и ефикасна судска постапка за Насилство, Предизвикување општа опасност и Расна и друга дискриминација преку прогонување на организации или на поединци поради нивното залагање за рамноправност на луѓето.

3. Бараме разјаснување, откривање на сторителите и покренување на судска постапка против сторителите на предходните напади врз ЛГБТИ Центарот за поддршка во Старата скопска чаршија.

4. Бараме отворање на кривична истрага за говорот на омраза кој следеше на социјалните мрежи по нападот и за Предизвикување омраза, раздор или нетрпеливост врз национална, расна, верска и друга дискриминаторска основа против медиумите кои пред настанот објавуваа содржини со говор на омраза и повици на насилство против ЛГБТИ луѓето.

ЛГБТ-заедницата претходно протестираше пред обвинителството со тоа што активистите легнаа во црни вреќи предупредувајќи што може да се случи доколку инситутциите ги игнорираат овие инциденти, а минатата недела на звучници пред истата зграда пуштаа звук од кршење на прозорци.

Поврзани новости