МВР го приведе мажот кој заедно со мало дете пукаше со пиштол

by fokus 21:58
21:58

Од МВР информираат дека вечерва привеле 39-годишен маж, кој заедно со мало дете пукаше со пиштол на новогодишната ноќ, а видеото го објави на „Тик-Ток“.

-Во врска со случајот пренесен преку видео снимка на социјалната мрежа „Тик-Ток”, МВР преку Секторот за компјутерски криминал и дигитална форензика при Бирото за јавна безбедност веднаш презеде мерки и активности за утврдување на деталите од видеото, меѓу кои и откривање на идентитетот на лицето.

- Advertisements -

Како резултат на тоа, денеска (02.01.2021) во 20.10 часот полициски службеници од СВР Тетово го лишиле од слобода А.Џ.(39) од с.Боговиње, поради основано сомнение дека на социјалната мрежа „Тик-Ток“ објавил видео, на кое малолетно дете пука со пиштол, а му помагаат две лица.

Тој е задржан во Полициско одделение Камењане и се преземаат мерки за расчистување и документирање на случајот, по што против него ќе биде поднесен соодветен поднесок за „недозволено изработување, држење и тргување со оружје или распрскувачки материи”, предвидено и казниво по чл.396 од Кривичниот законик, информираат од МВР.

Оттаму додаваат дека за настанот е информиран и Центарот за социјална работа, кој презема соодветни мерки согласно нивната надлежност.

-МВР ќе продолжи и понатаму посветено да работи и да ја става безбедноста на граѓаните на прво место!, информираат од МВР.

Поврзани новости