На обвинетите Сашо Мијалков и Горан Грујевски, кој е во бегство, повеќе од јасно им било какви се податоци се зачувуваат во системот за следење на комуникаци и какви се последици по нив може да има објавувањето на овие податоци. Поради тоа тие решиле да го уништат системот за следење на комуникации „Најс трак”, рече денеска јавната обвинителка Ленче Ристоска, која се уште ги изнесува завршните зборови во случајот „Таргет-Тврдина”.
– Обвинетиот Мијалков, како би оневозможил да се поврзе дека објавените разговори потекнуват од системот за следење на комуникаци во УБК со искористување на своето влијание и службена положба побарал од обвинитетиот Горан Грујевски да изврши службено дејствие што не би смеело да се изврши и да организира и спроведе ништење на системите за следење на комуникаци „Веринт” и „Најс”, иако не постоело реална потреба од ништење на системот „Најс”, рече обвинителката Ристоска.
Обвинетиот Мијалков, како што наведе обвинителката, во својата одбрана потврдил дека бил запознат со ништењето на системите и дека е неспорно оти тој ги дал насоките за ништење на системот „Најс”.
– Ништењето на опремата на УБК се извршувало на два наврати во 2015 година. Активностите за ништење на ова опрема започнуваат на почетокот на 2015 година. Сведокот Сашо Трајковски, појасни пред Суд дел од разговорот со Горан Грујевски „уште да го спакуваме системот со документи и ќе го ништиме”. Така и се случило. Веднаш по 9 февруари 2015 година, кога прв пат јавно се објавуваат материјалите од незаконското следење на комуникациите, Горан Грујевски им дал налог на помладите инженери и техничари во УБК, системот „Веринт” кој се наоѓал во систем салата на 4 кат да биде изнесен и симнат во гаража, посочи обвинителката Ристоска во завршниот збор.
Завршните зборови за случајот „Таргет-Тврдина” уште се во тек.