Матис: САД ја ценат политиката на спротивставување на Македонија во однос на Русија

by fokus 19:57
19:57

САД ја ценат политиката на спротивставување на Македонија во однос на Русија со протерување на дипломатот и дадената подршка на сојузниците во запирање на руската агресија, изјави денеска американскиот секретар за одбрана Џејмс Матис на официјална средба со министерката за одбрана Радмила Шекеринска.

Како што јави дописникот на МИА од Вашингтон, Матис укажал дека поканата за членство во НАТО ќе следува „веднаш штом ќе се постигне заеднички прифатливо решение на прашањето за името“ со Грција.

- Advertisements -

– Ја поздравуваме вашата работа со Грција на разрешувањето на ова прашање и се надевам дека наскоро ќе има резултати. Не сакаме да ве видиме запрени пред вратите на НАТО. Денешната безбедносна состојба бара дух на пријателство меѓу сите оние кои се залагаат за слобода, основни човекови права и владеење на правото, нагласил Матис.

Тој потсетил дека Македонија е партнер на НАТО и оти САД ги ценат обврските кои нашата земја ги презеде со испраќањето на војници во мисијата „Одлучна поддршка“ во Авганистан, придонесот кон коалицијата за пораз на ИСИС, како и решителната одлука да се издвојуваат 2 отсто од БДП за одбраната.

Ова е прва официјална средба на Матис со Шекеринска, прва на еден американски секретар за одбрана со свој македонски колега по шест години.

Министерката Шекеринска се заблагодари за цврстата поддршка што Македонија ја добива од САД и потсети на силниот консензус во државата од нејзиното осамостојување, за членство во НАТО.

Поврзани новости