Љупчо Ристовски: Само експертска Влада е решение за кризата!

by Фокус 08:58
08:58

Секој обид за повторно неколкумесечно одложување на изборите, без да се променат клучните актери на политичката сцена кои ја внесоа државата во вртлогот на пропаст и без да се поместат лостовите за перпетуирање на злото од оската на моќта е однапред осуден на неуспех.

Исто така, секоја небулоза од типот на “влада на национален спас“, во ваква констелација, повторно со истите актери и истите лостови на влијание на сцена ќе биде само ново продлабочување на раздорот и судирите внатре.

- Advertising -

Нема излез од кризата без да дојде на сцена експертска влада (од типот на Кљусевата) со широка подршка на партиите во парламентот, со нови ликови кои имаат силно изразен демократски и прогресивен капацитет за просперитетна Европска Македонија, кои би имале храброст, сила и знаење да го премостат постојниот јаз во општеството, со прецизен мандат од најмалку 18 месеци и со одврзани раце да ја стабилизираат кризата и да го ресетираат демократскиот капацитет на државата.

Сегашните актери на политичката сцена, и од двете најголеми политички партии се премногу “зацапани“ во живата кал на омразата и горделивоста, за да повратат доволно доверие од општеството за историски исчекор кон нормалност во политичкото општење.

Ако има малку чест и достоинство во нив, треба да сфатат дека во име и во интерес на нацијата и државата, и од почит кон идните генерации Македонци, треба да се повлечат од сцената и да отстапат простор на малку нормалност во политичкото општење, па и по цена на нивно трајно детронирање од политиката.

Во спротивно, нацијата “на нозе“ ќе мора да се избори за нормалноста. Затоа, бидете подготвени и решителни да застанеме сите “на нозе“!

Поврзани новости