Против поранешниот директор на охридскиот „Градски пазар“, Тони Коталески, е поднесена кривична пријава, за сторено кривично дело „проневера во службата“, Секторот за внатрешни работи Охрид го сомничи Коталески дека присвоил два мобилни телефони.
Според полицијата станув азбор за телефони марка „Samsung Galaxy S7 Edge“ и „Samsung Galaxy А5“ во вкупна вредност од 71.998 денари. Во оваа вредност, велат од МВР, Коталески предизвикал штета за Јавното претпријатие.
„Пријавениот во текот на април 2016 година во својство на одговорно лице, директор на Јавното претпријатие „Градски пазар“ Охрид, склучил договор за телекомуникациски услуги со правното лице „Оне Вип“ ДОО Скопје, според кој, му била доделена субвенција за набавка на пет мобилни телефони марка „Samsung Galaxy“ во вкупен износ од 129.000 денари. Тој, како одговорно лице на Јавното претпријатие, телефоните не ги прикажал во материјалното сметководство и во пописните листи, иако, бил должен да ги прикаже како средства на Јавното претпријатие. По разрешување од функцијата директор на Јавното претпријатие, сега пријавениот бил должен да ги раздолжи сите предмети доверени во службата меѓу кои и мобилните телефонски апарати. Тој, тоа не го направил и противправно присвоил два мобилни телефони“, велат од МВР.