Од повеќе институции во Република Македонија имаме информации дека на вработените во истите им се врши притисок од страна на раководителите да дојдат пред Државната Изборна Комисија и да протестираат со цел да извршат притисок врз работата и носењето на одлуки на истата, вели во соопштението дополнителниот заменик на министер за информатичко општество и администрација, Александар Кирацовски.
-Сакаме да ја информираме јавноста дека извршување на партиски и изборни активности во текот на работното време во јавниот сектор е спротивно на член 38 од Законот за вработени во јавниот сектор, а вршењето на закана, оневозможување и спречување на утврдување или објавување на резултатите од гласањето е казниво согласно член 158 од Кривичниот законик. Ние нема да дозволиме кој било вработен во јавниот сектор да трпи притисоци и понижувања и да биде инструмент во рацете на режимските слуги во заминување!, вели Кирацовски.
Тој поднесе инцијатива за Државниот инспекторат за труд, Државниот управен инспекторат и Министерството за внатрешни работи за вонреден надзор на работата на следниве институции: Општина Штип, Управа за јавни приходи – Регионална дирекција Штип, РЕК Битола.