Министерството за внатрешни работи им врачи платни налози за неносење на маска на сите 15 функционери од ДУИ кои на 4 јануари се сликаа собрани во новата зграда на Министерството за политички систем без маски и без дистанца, славејќи го роденденот на нивниот лидер, Али Ахмети.
Од Министерството за внатрешни работи за Фокус потврдија дека платните налози се врачени и дека како и за сите граѓани така и за функционерите важи правилото дека ако ја платат казната во рок од една недела, ќе им се намали на 10 евра.
Според извори од истрагата институциите работат и на нови казни кои се однесуваат на забраната за јавно групирање на повеќе од четири лица.
Министерот за надворешни работи, Бујар Османи на 4 јануари ја објави спорната фотографија на Фејсбук, а на неа се гледа како функционери на ДУИ без маски и дистанца го славеа шеесет и вториот роденден на Ахмети, но и новото седиште на Министерството предводено од првиот вицепремиер, Артан Груби.