Поранешниот пратеник од Златна зора и еден од членовите што беа високо во партиската хиерархија, но и меѓу обвинетите во судскиот случај за формирање криминална организација, Илиас Касидиарис, денеска најави дека формира нова партија со цел, како што вели „Грција одново да стане голема и силна“ и да се спротивстави на „исламизацијата и планот за замена на грчкото население“, јави дописничката на МИА од Атина.
Преку седумминутна видео порака, која самиот ја нарекува обраќање до јавноста, вели дека иницијативата е да се формира движење на Грци „за национално преживување и одново раѓање на хеленизмот“ и „за една и единствена визија: голема слободна и силна Грција“.
-Се спроведува организиран план за замена на населението. За неколку децении, ние и нашите деца сме во опасност да бидеме малцинство во нашата татковина, вели Касидиарис, ги обвинува Нова демократија дека се „измамници кои секојдневно промовираат план за исламизација и дехеленизација на Грција“ и медиумите дека го прикриваат овој план.
Ги повикува Грците да се приклучат, да достават предлози, а за две седмици ќе се презентира името, знакот и политичката линија на партијата.
Касидиарис беше портпарол на партијата и високо во партиската хиерархија, но и во хиерархијата на криминалната организација Златна зора, според судскиот процес што од април 2015 се води против партијата, а во следните месеци се очекуваат и пресудите.