Откако пред десетина дена беше донесена одлука за укинување на повластената цена на електрична енергија за производителите во прехранбената и замрзнување на цената на белиот и полубел леб, Владата предводена од СДСМ вчера донесе и одлука за корекција на цените на бројни продукти, рече Дарко Каевски од СДСМ.
-Со Одлука на Владата, од 13 март, понеделник, се замрзнува, односно се намалува цената на тестенините, за 15 отсто во однос на цената која се применувала во трговијата на мало на први март оваа година. Тоа значи намалување на цената на шпагетите и макароните за околу осум до девет денари. Покрај тоа, се укинуваат и царинските давачки за увоз на овие продукти за период од 13 март 2023 година до 31 мај 2023 година – рече Каевски.
Тој додаде дека се корегираат и цените на млекото и млечните производи, односно на трајното кравјо млеко со масленост од 2,8, 3,2 и 3,5 проценти , урдата, кравјoто бело сирење и мешано бело сирење, кравјиот кашкавал, киселото млеко, павлаката и јогуртот кој е без додатоци.
-Цените на овие продукти се намалуваат за десет отсто во однос на цените кои се применувале на први март 2023 година, во трговијата на мало. Оваа одлука ќе се применува од 17 март 2023 година до 31 мај оваа година. Во период на справување со последиците од глобалната економска и енергетска криза, не дозволуваме никој да биде оставен сам, ниту пак некој да профитира врз грбот на граѓаните – порача Каевски.