Јавното обвинителство донесе одлука да го одбие нашето барање за кривично гонење на Миленко Неделковски за ширење омраза и загрозување на сигурноста на граѓаните, информираа денеска на прес конференција Здружението на новинари (ЗНМ) и Самостојниот синдикат на новинари и медиумски работници (ССНМ).
-На наше големо изненадување обвинителката Јасмина Костевска Здравевска го одби барањето како неосновано. Таа смета дека Неделковски само искажал негови ставови, не поттикнувал омраза, дискриминација и насилство врз основа на национално потекло или верско убедување. Обвинителката цени дека пријавениот со своите постови не ја загрозил сигурноста на новинарите, рече Насер Селмани, претседател на ЗНМ.
ЗНМ и ССНМ веќе ја обжалиле оваа одлука на Јавното обвинителство до Вишото јавно обвинтелство и се надеваат дека тоа објективно ќе ја процени ситуацијата и ќе отвори предмет против Неделковски за ширење омраза и упатени закани.