Денешното рочиште за случајот “Рекет” се одложи, бидејќи во судница екс специјалната обвинителка Катица Јанева беше сама, односно нејзините адвокати не се појавија.
Адвокатот Дељо Кадиев се уште е на болничко лекување, а и адвокатката Ирена Фрчковска била со нарушена здравствена состојба.
-На 21 стигнато е барање за одлагање на рочиштето од адвокатката Ирена Фрчковска, заедно со медицинска документација со известување за отворено боледување. И за адвокатот Дељо Кадиев е пристигната информација дека од 8 јануари е на болничко лекување, истакна судијката Васка Николовска Масевска.
Таа се обрати до обвинетата Јанева, бидејќи се работи за притворски предмет, и не смее да се одолговлекува постапката, па ја праша дали ќе ангажира други адвокати или да назначи адвокати по службена должност.
-Јас имам адвокати, толку ќе кажам, рече Јанева.
Откако судијката инсистираше да се произнесе, Јанева рече:
-Не би сакала да бидам погрешно сфатена, ваши се одлуките, вие одлучете, рече Јанева.
Тогаш судијката посочи дека доколку во понеделник не се појават адвокатите, ќе и ангажира бранители по службена должност.
Во судница беше присутна обвинителката Лиле Стефанова која требаше да сведочи.
Валентина Вурмо