Хуман гест на Општина Валандово по повод празникот: Поддршка за храбрите жени кои се борат со рак!

by fokus

По повод Меѓународниот ден на жената Осми Март, Општина Валандово донираше симболична сума од 30.000 денари за здружението за борба против рак ,,Борка – за секој нов ден”.

Веста за ,,Фокус” ја потврди градоначалникот Перо Костадинов, кој вели дека ова е знак на поддршка за храбрите и континуирани активности на здружението.

-,,Борка” е невладина, непрофитна организација, основана за поддршка на граѓаните, пациентите, нивните семејства и здравствените организации во борбата против сите видови на рак. Здружението има особена заслуга за еманципацијата и поддршката на жените во нивната борба со ракот на дојка. Здружението соработува со сите вклучени релевантни фактори во општеството и во својата работа се фокусира кон поддршка на пациентите заболени од рак и организирање различни активности за подигање на свеста во заедницата за оваа болест – вели Костадинов.

Додава дека неопходно е жените да имаат право на највисоки достапни стандарди на физичко и ментално здравје, и како рамноправна и емпатична заедница е заеднички предизвик.

-Уживањето на ова право е витално за нивниот живот и добросостојба. Сите заедно, треба да работиме на подигање на свеста за подобрување на правата на жените, нивно изедначување со мажите и еднаков пристап во сите сфери на општественото живеење. Да се ослободиме од оковите на минатото и да изградиме заедница која се грижи за секого, на ист начин – порача градоначалникот.

Вики Клинчарова

Поврзани новости