Германскиот специјален пратеник Јоханес Хајндл во емисијата „360 степени” на Алсат ТВ, порача парламентарните избори да се одржат пред 2018-та година.
Хајндл потенцира дека пред да се одреди датумот на избори, мора да се спроведат реформите за обезбедување терен за фер и демократски политички натпревар.
-Нема логика да се организираат избори во Македонија без да се исполнат условите за тоа” – порача Хајндл.
Според него поважно од датумот на изборите е постигнување консензус во наредните неколку седмици, пред летните одмори, за двете клучни прашања, односно, избирачкиот список и медиумите.
-Мојот впечаток по разговорите е дека барем за Избирачкиот список би било можно скорешно решение. Во однос на медиумите се уште се водат разговори, но тоа е комплексна тема, но се надевам дека партиите ќе дојдат до решение пред летните одмори. Ако партиите самите не постигнат решение тогаш би можеле да се повикате на совет и експертиза на меѓународни експерти” – вели Хајндл во интервјуто на Алсат ТВ.