Откако премиерот Никола Груевски летуваше во Турција по покана од Ердоган, зимава реши да ја прифати понудата од рускиот претседател Владимир Путин и во февруари да помине две недели во Русија – по една на Сибир и една седмица во возот до Владивосток, информираат од кабинетот на премиерот.
Како што дознаваме, а и каков што го познаваме, Груевски и на овој одмор нема да се релаксира туку ќе ја искористи шансата одблизу да се запознае со тајните на успехот на својот идол, Владимир Владимирович.
Во владиното соопштение не е наведено, ама се претпоставува дека премиерот ќе го придружува Путин на неговите редовни активности на Сибир, како што се риболовот, јавањето и пливањето „пеперутка“ во водите ладни до минус 20 Целзиусови степени.
Неофицијално, Груевски ќе донесе и сувенири за своите најблиски соработници. Премиерот веќе пикирал шубара за кумот Ставрески, купил матриошки за Јанкулоска и гемче со тетрис за Никола Тодоров, бидејќи министерот за здравство е многу по видео-игрите. Имено, така научи и да оперира!
