Осомничените во случајот „Талир“ Никола Груевски, Илија Димовски, Мартин Протуѓер и Кирил Божиновски денеска нема да дојдат во Специјалното обвинителство бидејќи не ги примиле поканите за да присуствуваат.
Претходно во СЈО дојдоа екс техничкиот премиер Емил Димитриев и пратеничката Даниела Рангелова исто така осомничени во случајот кои кратко изјавија дека дошле за да направат увид во доказите а не дадат исказ.
– Не се чувствувам виновна бидејќи ништо погрешно не сум направила, изјави Рангелова за медиумите.
На прашањето на новинарите како партијата ВМРО-ДПМНЕ се стекнала толку голем имот таа истакна дека нема информација за тоа и дека треба да се праша тој што го стекнал имотот.
Претходно од СЈО излезе и екс техничкиот премиер Емил Димитриев, кој кратко се обрати пред медиумите и кратко изјави дека во СЈО бил повикан во својство на осомничен. И тој како и Рангелова рече дека денеска не дал исказ, туку побарал увид во доказите по што дополнително ќе се произнесе пред обвинителите.
Функционерите на партијата се повикани во СЈО да дадат искази како осомничени во случајот „Талир“, каде за финансирањето на ВМРО-ДПМНЕ се осомничени 14 лица за перење пари од кои 9 лица како директни извршители и 2 како помагачи.
Во овој случај е осомничен лидерот на партијата Никола Груевски и сите генерални секретари во партијата од 2009 до 2015 година, меѓу кои и Димитриев, Мартин Протуѓер и Кирил Божиновски. Осомничени се и директорите на центарот за комуникации, а оваа функција долги години ја имаше Илија Димовски, додека во 2015 година на ова место дојде Иво Котевски.