Груби ги повика институциите да изречат казни за сликата без маски

by Fokus 10:18
10:18

Првиот вицепремиер и министер за политички системи и односи меѓу заедниците, Артан Груби, во изјава за „360 степени“, вели дека заедно со функционерите и раководството на ДУИ преземаат целосна одговорност и ги повикуваат институциите да ги казнат за сликата без маски од новите простории на неговото министерство.

-Реакциите на јавноста за сликата без маски се оправдани и сметам дека згрешивме за миг и со објавувањето на истата се испраќа погрешна порака на сметка на потребата за носење лична заштита. Покрај грижата за своето лично и семејно, заедно со јавното здравје, ние сме посветени како избрани претставници да бидеме пример и да предводиме со дела во сè што правиме. Жалам што во оваа инстанца не бевме на висината на оваа наша посветеност. Затоа преземаме целосна одговорност, спремни сме да ги сносиме последиците и да ги почитуваме одлуките. Ги повикуваме надлежните институции да изречат мерки кои ќе ги испочитуваме како секој граѓанин, вели Груби за „360 степени“.

- Advertisements -

Фотографијата беше направена пред два дена, кога министерството се вселуваше во новите канцеларии. Тој ден и лидерот на ДУИ, Али Ахмети го прослави 62. роденден, а сопартијците го искористија неговото присуство за да му приредат изненадување. Фотографија како функционери од ДУИ седат во новите простории прв на Фејсбук ја објави министерот за надворешни работи Бујар Османи. Покрај споменатите, Ахмети, Груби и Османи, на неа можеа да се забележат и претседателот на Собранието, Талат Џафери, како и министрите Фатмир Бесими и Насер Нуредини, пратеникот Арбер Адеми и други.

Поврзани новости