Добивањето на чиста препорака за отпочнување на преговори за членство на Република Македонија со Европската унија, претставува потврда за храбро сработеното, потврда дека реформската влада и новото парламентарно мнозинство ја вратија земјата на евроатлантскиот пат, потврда дека Република Македонија е успешна приказна, истакна претседателот на Комисијата за европски прашања, Артан Груби.

„Заслугата им припаѓа на граѓаните кои што ги инвестираа сите свои очекувања и напори во реализација на евроатлантскиот стремеж. Како политичко лидерство со визија се вложивме да ги исполниме домашните задачи. Посветено, храбро, патриотиски и со исклучителна динамика се посветивме на остранување на сите пречки на нашиот пат кон Брисел, преку градење на добрососедски односи и мерки за доверба и надминување на споровите и недоразбирањата, но не заборавајќи го и финализирањето на нормативниот дел од Охридскиот Рамковен Договор – истакна Груби.

Според него, тоа е Македонија исправена кон иднината, тоа е денешната Македонија која сите треба да ја видиме, Македонија со демократски институции, одлични добрососедски односи и Македонија растеретена од меѓуетнички проблеми.

“Интересите и очекувањата на граѓаните се нашиот патоказ”, изјавува Груби, дополнувајќи дека насоките за нашите реформи кои ќе ги почитуваме на патот кон ЕУ се во насока на воспоставување на институции што ќе гарантираат владеење на правото и на кои ќе им веруваат граѓаните, целосно независни, но и општествени одговорни медиуми, активни невладини организации и, вклучено општество, будна и ангажирана академска заедница, активни контролни механизми, судии и обвинители кои што ќе дадат придонес за реформирање на општеството преку примерно извршување на задачата, согласно словото на правото – додава Груби.

 

Груби посочува дека во услови на создадена позитивна клима околу процесот за европска интеграција, во земјата, во ЕУ и кај земјите членки, очекува во најкус можен рок и датум за старт на преговорите, истакнувајќи дека ова политичко лидерство е спремно да го понесе товарот на таквиот генерациски предизвик.

 

 

Содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.