Општина Центар денеска соопшти дека собира предлози за име на новиот Младински центар кој ќе биде лоциран кај поранешно „Матично“.
-Сите граѓани кои имаат желба, можат да го дадат својот придонес, да ја посетат веб страната на Општина Центар, centar.gov.mk и во полето предвидено за предлози за име на новиот Младински центар да го внесат својот предлог. Победничкото име ќе биде јавно објавено по завршувањето на собирањето на предлозите и изборот на победничкиот предлог, стои во соопштението.
Општина Центар во соработка со Швајцарската агенција за развој и соработка и УНДП, го реконструираат објектот на поранешно „Матично“, кој за многу кратко време ќе стане современ општински Младински центар, соопшти денеска Општина Центар.
Градоначалниците на Општина Центар и на Град Скопје, Саша Богдановиќ и Петре Шилегов, на почетокот на ноември лани ја најавија изградбата на новиот Младинскиот центар, каде после три месеци, градежните работи се на самиот крај.
Реконструкцијата опфаќа поставување нова фасада и покрив, внатрешно уредување на објектот, реконструкција на санитарниот јазол, промена на внатрешниот водовод, санирање на фекалната канализација, нови санитарии, ново електрично осветлување, телефонско и компјутерско вмрежување, видео мониторинг систем, како и громобранска и против пожарна инсталација.
Реконструктивниот зафат чини 6.941.282 денари со пресметан ДДВ. Општина Центар обезбеди 83 проценти од финансиските средства, односно 5.768.074 денари од Буџетот на општината за 2020-та година, а останатите 1.173.208 денари беа обезбедени од Програмата за развој на Обединетите Нации (UNDP), во форма на донација.