Градоначалникот Георгиевски одговори на прозивката на Фатиме Фетаи

by fokus

По прозивката на обвинителката Фатиме Фетаи, со реакција се јави градоначалникот на општина Гази Баба, Борис Георгиевски, кој вели дека нема надлежност да знае кој граѓанин има судски рочишта. Тој денеска беше прозван од Фетаи, која побара од Кривичниот суд да испрати допис до Општина Гази Баба и да побара одговор од градоначалникот зошто дозволил обвинет во предметот „насилство во Општина Центар“, да замине на службен пат. Поради отсуство на обвинетиот, Александар Трајковски, советник во Општината, денешеното судење беше одложено.

Неговата реакција ја пренесуваме во целост:

„Јас како градоначалник немам и не можам да имам информација кога одреден граѓанин има закажано рочиште на суд. Особено за некое лице кое не е ни вработено во општината Гази Баба.

Никогаш не сум имал, ниту некогаш ќе имам намера да заштитам некого. Секој оној кој извршил повреда на Законот и предизвикал кривично дело, треба за своите постапки да одговара пред судот. До сега, за овој случај никој не побарал било каква асистенција од мене, или пак информација околу неговото отсуство. Јас секогаш стојам на располагање согласно моите надлежности како градоначалник, за било каква асистенција или информација која би им била потребна на специјалното обвинителство или судот.

Александар Трајковски, кој е обвинет во случајот на СЈО за насилството во општина Центар е член на Советот на општина Гази Баба избран на последните локални избори на листата предложена од ВМРО-ДПМНЕ. Неговото присуство во Хрватска е токму по предлог на неговата советничка група. Покрај него во Хрватска се заминати и други седум советници од сите советнички групи, како и претставници од ЦУК и месните заедници, кои учествуваат на работилница за превенција од елементарни непогоди.“

Поврзани новости