Галакси Бенд’’ од Кавадарци, кој беше прогласен за ,,Група на годината’’ од слушателите на Радио Кавадарци за 2016 година, деновиве сними нов проект. Станува збор за неколку авторски песни и обработки на стари македонски нумери.
Фронтменот на групата, Васко Мелов, кој е дипломиран музичар, кларинетист, вели дека се радува што старите македонски песни не ја губат својата популарност и публиката секогаш ги слуша со задоволство. Со бендот, новите аранжмани на традиционалните песни ги правеле да бидат поинтересни и лесно прифатливи за помладата публика, но и да ги потсетат повозрасните на подзаборавените нумери, со што се продолжувала нивната популарност и слушаност со генерации.
,,Откако го оформивме бендот, пред околу четири години, не паметам кога сме имале слободен викенд. Редовни сме на сите свадби и семејни свечености во Тиквешијата и драго ни е што нашите сограѓани ни ја даваат довербата да им ги развеселуваме значајните настани. Она што е забележливо на разните прослави е дека нашиот народ, без разлика на возраста, ужива во старите македонски песни кои со децении, да не речам и векови, не губат од популарност. Со цел да ги освежиме најпопуларните стари македонски песни, снимивме нов проект, на кој ги отсвиривме и отпеавме легендарните нумери со нови аранжмани. Притоа, водевме сметка да се сочува и оригиналниот мелос, да не се изгуби од автентичноста на делото, затоа што Македонија е културна ризница на стари песни. Етно звукот ни беше предизвик, и му дадовме мало освежување, современа обработка и помодерен аранжман. Во наш стил на некој начин вративме некои подзаборавени песни, врз кои никогаш не смее да залегне прашина’’ – раскажува Мелов.
И минатата година, во соработка со австралиската ИН ТВ, ,,Галакси Бенд’’ сними повеќе обработки на стари песни, но и три авторски нумери. Помеѓу новите снимани материјали се наоѓаат песните ,,Ангелина’’, ,,Се ми земаш животе’’, ,,Мома крај извор седеше’’ и други.
Мелов додава дека успеале да ја задржат автентичноста на песните, но и да ги прилагодат според денешните продукции. Според него, имаме многу подзаборавени антологиски песни, кои се дел од нашиот народен културен идентитет, и кои препеани во помодерен мелос повторно стануваат популарни кај народот.
Вики Клинчарова