Претседателката на Европската комисија, Урсула фон дер Лајен, ја повика Србија да се приклучи на ЕУ во заедничката набавка на гас и најави 160 милиони евра итна поддршка на државниот буџет за снабдување со енергија.
Фон дер Лајен денеска по посетата на работите на изградбата на гасниот интерконектор меѓу Србија и Бугарија изјави дека знае оти иднината на Србија е во ЕУ бидејќи Унијата не е целосна без Србија.
„Знам дека иднината на Србија е во ЕУ, знам дека нашата ЕУ не е целосна без Србија затоа што ја делиме истата определба за заедничка иднина и затоа ајде да продолжиме да работиме на тоа заедно“, рече таа на заедничката прес-конференција со Српскиот претседател Александар Вучиќ. Таа додаде дека ЕУ и Западен Балкан, како и Србија се дел од Европската енергетска заедница.
Докажаниот метод на нашиот студент им помогна на илјадници луѓе да го подобрат видот – ги полуди сите во регионот
Фон дер Лајен рече дека благодарение на добриот напредок што го постигна, Србија е една од најнапредните земји на патот кон ЕУ и дека сега постои желба да се преземат понатамошни важни чекори кон ЕУ.
„Исклучително ми е драго што сум на ова посебно место што ја покажува длабоката поврзаност што ја имаме, како и нашата одлична соработка. Денеска го следиме напредокот на интерконекторот меѓу Бугарија и Србија и одлично е да се види како е овој важен проект се оформува“, рече таа, додавајќи дека 80 отсто од финансирањето е обезбедено од Европската комисија и Европската инвестициска банка.
Фон дер Лајен најави дека вечерва во Белград со претседателот Вучиќ ќе разговара за иднината и дијалогот меѓу Белград и Приштина. Таа изрази уверување дека многу брзо ќе се најде решение за спорот за замена на регистарските таблички на Косово. Во понеделник истекува рокот за пререгистрација на возилата со српски таблички и замена на табличките за оние со ознака Република Косово (РКС).
„Европската унија и нејзините партнери интензивно работат на изнаоѓање решение за регистарските таблички и длабоко сум убедена дека решение има, имаме добра волја од двете страни“, рече таа, додавајќи дека конкретно решение бара конструктивност и флексибилност од двете страни.
Вучиќ рече дека во однос на односите со Приштина, Белград ќе се потруди да ги зачува мирот и стабилноста, но и дека Приштина, а не Белград, ги направила сите еднострани потези досега.
Фон дер Лајен е во Србија како дел од неговата турнеја по Западен Балкан. Таа подоцна денеска ќе се сретне со премиерката Ана Брнабиќ, а за вечер е предвиден разговор со Вучиќ на тема односи меѓу Србија и Косово.