Во Кривичниот суд денеска ќе се одржи прво рочиште за нападот врз двајца новинари лани за време на протестите „За заедничка Македонија“. На обвинителна клупа ќе седне еден од напаѓачите на новинарот Александар Тодески и снимателот Владимир Желчески.
Новинарот и снимателот беа нападнати на 28 февруари минатата година пред Порта Македонија, на вториот ден од протестите. Напаѓачите на екипата веднаш избегаа од местото, но беа фотографирани при бегство од страна на фоторепортерите.
По нападот, двајцата завршија на ургентен центар со потрес на мозокот, откако беа нападнати со клоци и боксови, а беше искршена и камерата на порталот А1он. Веднаш по нападот и пред да пристигне полицијата, напаѓачите избегаа.
Телевизија Телма по настанот јави дека заменик командант на полициска единица спречил полицаец кој бркал еден од напаѓачите на новинарската екипа, а полицаецот изготвил и службена белешка.
Заменик командантот, кој е дел од бомбите побарал од полицаецот да ја прекине потерата и да се врати кај повредените. Оваа информација ја потврди и тогашниот министер, актуелен заменик министер за внатрешни работи, Агим Нухиу, кој тогаш рече дека ќе покрене дисциплинска постапка за заменик командантот, но за случајот нема да му се суди на него, туку единствено на еден од напаѓачите.
Иако полицијата приведе повеќемина за случајот, обвинителството поднесе обвинение за само едно лице, кое успеа да го препознае од фотографиите и од безбедносните камери на Градскиот трговски центар.