Ердоган: Ќе им помогнеме на сириските бегалци да се вратат во својата татковина

by fokus 20:32
20:32

Турскиот претседател Реџеп Тајип Ердоган и неговиот руски колега Владимир Путин денеска во Москва по повеќечасовни разговори постигнаа договор за решавање на кризата во сириската провинција Идлиб.

На заедничката прес-конференција Ердоган вети дека Анкара „ќе им помогне на сириските бегалци да се вратат во својата татковина“.

- Advertisements -

Истовремено, Ердоган истакна дека Турција го задржува правото да одговори на евентуални дејствија на сириските воени сили.

– Турција го задржува правото да одговори на каков било напад од страна на режимот (на сирискиот претседател Башар ал Асад) со свои сили, нагласи турскиот лидер.

Москва и Анкара постигнаа денеска договор да создадат безбедносен коридор во провинцијата Идлиб, во реонот на сирискиот автопат М4.

– Страните се согласија да создадат заштитен коридор шест километри северно и шест километри јужно од автопатот М4. Конкретните параметри за функционирањето на безбедносниот коридор ќе ги договорат министерствата за одбрана на Руската Федерација и на Турција во рок од седум дена, се наведува во соопштението.

Од 15 март Русија и Турција ќе започнат заедничко патролирање низ автопатот М4 во Сирија од населбата Тромба до селото Аин ал-Хабр.

Русија и Турција ја изразија својата подготвеност да се борат со сите појави на тероризам.

– Изразивме неопходност да се почитуваат принципите на суверенитетот и територијалниот интегритет на Сирија. Исто така, убедени сме дека не треба да дозволиме ослабнување на борбата против меѓународниот тероризам, додаде рускиот претседател Владимир Путин.

Борбите во сириската провинција Идлиб е договорено да прекинат денеска на полноќ.

На крајот Путин му заблагодарил на Ердоган за посетата, нарекувајќи ги разговорите за Сирија „тешки“, но нагласи дека тие завршиле позитивно.

Поврзани новости