Двегодишното дете од Охрид починало од сепса, обвинителството утврдува кривична одговорност

Основното јавно обвинителство Охрид утврдува кривична одговорност за смртта на двегодишното дете од Охрид кое почина во август годинава на детското одделение во Медицинскиот центар Охрид.

„Обвинителството го доби секциониот протокол од извршената судско медицинска експертиза. Патолошко хистолошката дијагноза и резултатите од токсилошките анализи укажуваат дека смртта кај детето настанала поради воспаление на двете белодробни крила, по што инфекцијата навлегувајќи во крвта предизвикала сепса“, се вели во соопштението од Обвинителството.

Детето првпат било примено на 25 август и по препишана терапија пуштено дома. Поради влошување на состојбата истото во два наврати било донесено во охридската болница, последниот пат без знаци на живот.