Најверојатно, наредната недела лидерите на политичките партии ќе го објават договорот што се однесува до распределба на ресори, рече министерот за економија Крешник Бектеши, говорејќи за преговорите меѓу премиерот Зоран Заев и лидерот на Алтернатива Африм Гаши за влез на оваа партија во Владата.
-Нашиот став како ДУИ е дека се добредојдени во Владата сите политички партии кои ги споделуваат сите вредности во делот на интегрирање на нашата држава во ЕУ, за справување со здравствената и енергетската криза. Во моментов, многу е важно нашата држава да има стабилна влада, стабилно Собрание каде ќе се носат вакви важни одлуки, а во делот на отстапување на ресори веќе при крај се преговорите – рече Бектеши на Трилинг.
Заев и Гаши објавија дека постигнале начелна согласност за коалициска соработка и деновиве преговараат околу ресорите. Неофицијално, Алтернатива треба да го добие Министерството за информатичко општество и администрација, додека неизвесно е дали како втор ресор ќе го добијат здравство, или, пак, некој од труд и социјала, култура, земјоделство.