Вицепремиерот за европски прашања Никола Димитров денеска ќе престојува во работна посета на Брисел, што е всушност прво негово патување во седиштето на ЕУ со новата функција и воопшто прва посета на некој претставник на Владата од нејзиното формирање.
Од Секретаријатот за европски прашања (СЕП) наведуваат дека посетата се остварува во важен момент за земјава.
-Работната посета на заменик-претседателот на Владата Никола Димитров се случува во исклучително важен момент за Северна Македонија, во светло на дефинирање на Преговарачката рамка и одржувањето на првата меѓувладина конференција со ЕУ, што ќе означува и официјален почеток на пристапните преговори со Унијата, велат од СЕП.
Според најавата оттаму, предвидени се средби со потпретседателот на Европската комисија задолжен за промоција на европскиот начин на живот, Маргаритис Схинас и еврокомесарот за соседство и проширување, Оливер Вархеји, како и со други претставници на Генералниот директорат за соседство и преговори за проширување на Европската комисија.
На маргините на Советот за општи работи на ЕУ (ГАК) што неделава се одржува во Брисел, Димитров ќе оствари средба и со државниот министер за Европа на Сојузна Република Германија, Михаел Рот.
На средбите вицепремиерот, велат од СЕП, ќе ги отвори прашањата поврзани со ИПА 3 програмата, имајќи го предвид утврдувањето на повеќегодишната финансиска рамка на ЕУ 2021-2027 што е актуелно периодов. Во тој контекст ќе се зборува и за подготовките за димензионирање и објавување на најавената Економска програма за развој и инвестиции за Западен Балкан.