Министерот за надворешни работи, Никола Димитров, ја прокоментира оставката што ја даде вчера неговиот грчки колега, Никос Коѕијас. Тој му посакува на Коѕијас успех во иднина и вели дека со преговорите и склучувањето на Договорот успеале да направат нешто што било невозможно речиси три децении.
„Предводени од премиерите Алексис Ципрас и Зоран Заев, со министерот за надворешни работи Коѕијас имавме интензивни месеци на комуникација, станавме вистински пријатели и во период од една година успеавме да направиме нешто кое во претходните 27 години се сметаше за невозможно – ги приближивме нашите две земји и го склучивме историскиот договор од Преспа, градејќи мост на пријателство и докажувајќи дека и нашиот регион може да решава спорови и да создава иднина. Никос, од срце ти посакувам добро здравје и успех во сите идни предизвици. Од наша страна, ние ќе продолжиме со силна посветеност кон заокружување на ова историско решение, заедно со останатите прогресивни и демократски сили во Скопје и Атина“, порача Димитров.