Децата не смеат да умираат поради долги процедури: Се бара изготвување на ,,Тамарин закон”

by fokus

Заменик-претседателката на Меѓународниот сојуз, Јасна Мандиќ, која е во секторот на лица со попреченост и претседателка на „Ресурниот центар на родители на деца со посебни потреби“, информира дека ќе бара соработка помеѓу Министерството за здравство, Фондот за здравство и невладиниот сектор да се изготви т.н „Тамарин закон“, приоритетните случаи по утврдени критериуми да се решаваат во рок од 48 часа без долги процедури и бирократија.

Често пати, родители на деца на кои им е потребно скапо лекување на некоја од клиниките во странство, воопшто не бараат средства од Фондот за здравство, бидејќи, како што тврдат, процедурата е долга и бавна, а тие најчесто немаат време за чекање. Наместо да талкаат по долгите административни лавиринти на нашето здравство, додека децата им се борат за живот, спасот го наоѓаат во хуманоста на граѓаните и нивните донации.

Деновиве во јавноста е актуелен случајот со малата Софија Караманолева, која треба да замине на лекување на клиниката ,,Санте плус’’ во Истанбул, Турција. Претседателот на Меѓународен сојуз и сопственик на 1ТВ и БМЈ Медиа груп, Бојан Јовановски, се откажа од комерцијалните средства од „Санте Плус“, во висина од 28.000 евра, кои со анекс ќе се пренасочат за лекување на Софија. Тој ја соопшти веста само еден ден по објавата на апелот за помош од страна на родителите на девојчето.

Сепак, факт е дека животот на децата не смее да зависи од хуманоста на граѓаните. Токму поради тоа, Мандиќ ќе бара изготвување на Тамарин закон, каде долгите процедури и бирократијата ќе станат минато. Името на предлог законот доаѓа по случајот со Тамара Димовска од Велес, која почина на девет годишна возраст, чекајќи на државен трошок да замине на операција во Турција, во февруари 2015 година.

Вики Клинчарова

Поврзани новости