Десковска: Уште колку Груевски ќе го штити Тодоров?

by Фокус

Пратеничката на СДСМ Рената Десковска, на денешната собраниска седница посветена на пратеничките прашања, го праша премиерот Никола Груевски дали со тоа што досега не бара и предлага оставка на министерот за здравство, Никола Тодоров, покажува дека министерот е само извршител на неговите неодговорни политики во здравството.

– Само со еден потпис на барањето за разрешување на Тодоров може да ги решите проблемите. Уште кокку човечки животи треба да згаснат за да добиеме одговорен министер за здравство? – го праша Десковска премиерот.

Таа посочи дека периодов многу родилки, новороденчиња и повозрасни пациенти починаа во болниците, што, според неа, е проследено со неодговорен и игнорантски однос од здравствените власти.

– Во болницата во Гевгелија има одделение за гинекологија и за педијатрија, а нема специјалист-гинеколог и специјалист-педијатар, што повлекува законска одговорност токму кај министерството – истакна сдсмовската пратеничка.

Груевски, пак, во одговорот рече дека во овој сектор се инвестирало многу во опрема, реконструкција и изградба на нови болници, се имплементирале нови методи на дијагностицирање и интервенции…

– Сите знаат дека кога СДСМ беше на власт немаше ни дел од ова што го имаме како инвестиции, обуки, системски промени. Лесно да се обвини, тешко е да се направи нешто. Нашите реформи дадоа сериозни резултати – истакна премиерот.

Поврзани новости