Министерката за правда, Рената Дескоска, на денешната конферанција во републичкото јавно обвинителство за истражните центри, уште еднаш ги повика политичките партии да се усогласат за Законот за јавното обвинителство.
-Јасно е дека без силно обвинителство попусто зборуваме за правна држава. Сите партии да размислат каде ја гледаат иднината на нашата земја и дали се искрени за поддршката на државата кон европските аспирации, рече Дескоска.
Таа истакна дека планот на одредени политичари бил по 15 септември да пропаднат сите предмети на СЈО.
-Трансферот на предметите од СЈО во републичкото јавно обвинителство ги помати сметките на оние кои сакаа по 15 септември да нема специјален јавен обвинител и да пропаднат сите предмети. Тој план пропадна, но направи штета. Можеби Законот за ЈО не е нужен за предметите на СЈО, но е неопходен за заокржување на реформите во судството, рече министерката Дескоска.
Министерката порача и дека истражните центри се најзначајната алатка во рацете на обвинителите.
-Не постои брза предистрага и истрага без истражните центри кои се најсилната алатка во рацете на обвинителите. Тие го следат патот на парите, тие се очите и ушите на обвинителите, тие се оние кои ги собираат сите парчиња од сложувалката. Крајната цел е ефикасна истрага која ќе обезбедни цврсти докази за пред суд, заклучи министерката Дескоска, зборувајќи за важноста на истражните центри.
В.В.