Амнестија за криминал нема да има. Секој што го прекршил законот ќе одговара, а парите коишто со години се излевани од државата преку оф шор кмпании ќе ги вратиме назад кон граѓаните, истакна Рената Дескоска, пратеничка од СДСМ на трибината во Штип.
– По демократските промени ќе се почитува владеењето на правото и законите ќе важат за сите подеднакво – тврди Дескоска.
Оливер Спасовски, пак вели дека започнуваат промените во Македонија и дека се чувствува нова енергија, нова надеж за сите граѓани коишто сакаат подобар живот и повисок стандард.
– Фокусот во Програмата на СДСМ е отворањето на нови работни места со достоинствени, повисоки плати. Затоа, ќе обезбедиме 140 милиони евра, неповратна државна помош за домашните мали и средни претпријатија, коишто ќе креираат нови работни места. Но, не било какви работни места, туку достоинствени работни места со повисоки плати и загарантирани работнички права. Завршува времето на експлоатацијата на работниците во Македонија. Минималната плата ќе ја зголемиме на 15 илјади денари а просечната ќе достигне до над 29 илјади денари – рече Спасовски.