Даштевски: Кога завршуваат изборите на многумина им олеснува но нас допрва нѐ чека работа

by Fokus

Се надеваме дека во текот на денот ќе ги разгледаме сите записници и се надеваме дека ќе бидат регуларни  како и дека за неколку часа ќе го завршиме овој процес. Кога завршуваат изборите на многумина им олеснува но нас допрва нѐ чека работа, вели првиот човек на ДИК Александар Даштевски за Утрински брифинг.

-До утрово беа целосно обработени 50 отсто од општините, а до пладне се очекува ДИК да ги има сите резултати. Во Комисијата не знаат колкава е излезноста оти, како што рече Даштевски, сѐ уште не е направен пресек.

Во врска со информацијата што вчера ја пренесе самиот Даштевски дека на некои гласачки места избирачките одбори самоволно решиле да не ги користат фингерпринтите за идентификација утрово тој ја ублажи изјавата.

-Не бев категоричен, реков дека имаме некои сознанија дека некои избирачки места самоволно престанале да ги користат фингерпринт апаратите. Тоа треба да е забележано во записниците, па ќе видиме, рече тој.

Според него, првиот круг поминал добро со оглед на тоа што ДИК имала мачна работа поради големиот број листи кои многу внимателно треба да се прегледаат. Сега на ред е утврдувањето на резултатите и решавањето по приговорите.

-Прво избирачките одбори ги бројат ливчињата и ги споредуваат од уредот и печатените, па одат во општинската комисија која ги споредува податовите и ги прибрира записниците и потоа тој материјал го носат кај нас во ДИК. ДИК ги потпишува овие записници дека се примени па потоа ќе чекаме 48 часа колку што е рокот за поднесување приговори по кои потоа ќе одлучуваме, вели Даштевски.

 

Поврзани новости