Министерот за внатрешни работи, Наќе Чулев попладнево преку стаус на својот Фесјбук профил информира дека информациите за наводно негово попречување на истрагата со кокаинот во село Крушопек се целосно неточни.
– Имено, во координација со италијанските партнери и надлежен македонски јавен обвинител на мојата прес конференција, и покрај инсистирањето на медиумите, информациите кои јас ги објавив, беа строго селектирани, целосни и точни. Ниту еднаш во моето обраќање на споменав количина, контролиран транспорт и имиња на конкретни држави. Веројатно, изнервирани од фактот дека медиумскиот ексклузивитет го граделе врз основа на неточни и непроверени информации, моите политички противници се обидоа тој гаф да го сокријат со евентуални забелешки дека со мојот прес сум ја попречил истрагата. Притоа, со оглед дека меѓународната операција е комплетирана, потврдувам дека 1.129 кг кокаин од Колумбија беа наменети со крајна дестинација во нашата држава, а дека 1 кг. кој беше фатен кај нас беше дел од контролиран транспорт, пишува Чулев на Фејсбук постот.
Тој додава и дека активностите на МВР во координација со ОЈО продолжуваат и понатаму во насока на идентификување и на други правни субјекти и физички лица инволвирани во наведените криминални активности.
Во оваа прилика, посочува Чулев, сакам да изразам огромна благодарност до нашите италијански партнери, но и до партнерите од регионот и припадниците на МВР, ОЈО и Царина без кои немаше да се реализира оваа значајна акција против кокаинската мафија.