Од Државен студентски дом Скопје потврдуваат дека вчера поради дождот попуштил плафонот во третата женска зграда на студентскиот дом „Стив Наумов“ поради што две соби биле поплавени. Причината, велат, е во тоа што олуците не биле исчистени, а проблемот потекнува од долгогодишната занемареност на одржувањето на зградата.
„Податоците на домот покажуваат дека за истоимената зграда последен пат биле одвоени средства во 2008 година, а средства за варосување не се одвоени дури и од 2006 година. Овие податоци се јавни, и ние сме подготвени да ги споделиме со јавноста доколку тоа е потребно. Олуците, поради чие неодржување е настанато поплавувањето, последен пат се исчистени точно пред 3 години, па истото предизвикувало поплавување на двете соби во повеќе наврати, што довело дури и до заскапување на неколку места“, вели во соопштение в.д. директор Атанас Бојчев.
Тој додава дека раководството на студентскиот дом веднаш интервенирало, со цел да го заштити здравјето на студентите.
„Понудено е дислоцирање додека се врши санирањето на собите, односно дезинфекцијата, варосување и реновирање а во исто време ангажирана е и фирма која ги чисти олуците со цел да се спречи повторно поплавување“, додава Бојчев.