Екс директорот на ДБК Слободан Богоевски утре во Основниот суд Скопје 2 треба да се соочи со лидерот на ДУИ, Али Ахмети, а потоа и со неговиот близок соработник Муса Џафери, кои го тужат за клевета, поради изјавата на Богоевски дадена за Њујоршкиот суд, за случајот „Маѓар телеком“.
Пред три месеци се одржаа две подготвителни рочишта, но бидејќи на Богоевски се уште му течеше рокот за одговор на тужба, истите се одложија. Според поднесената тужба, Ахмети како отштета бара 3 милиони евра, а Џафери 2,5 милиони евра.
Изјавата што ја даде Богоески пред американската Комисија за хартии од вредност, како и пред окружниот суд во Њујорк во Македонија стана актуелна откако американскиот суд ја објави на својата интернет-страница, а македонските медиуми речиси интегрално ја пренесоа.
Според сведочењето на Богоески за Њујоршкиот суд, вкупно 7,5 милиони евра биле внесени во Македонија со службен владин автомобил за поткуп на тројца политичари, експремиер Владо Бучковски, Ахмети и Џафери.
Неговото образложение е дека согласно американското и македонското законодавство самата тужба за клевета не е дозволена, бидејќи тој изјавата од која Ахмети и Џафери се почуствувале наклеветени, односно дека во 2005 година двајцата примиле мито од 2,5 милиони евра, ја дал пред судот во Њујорк, како сведок во случајот „Маѓар Телеком“.
Богоевски потсети дека со поднесените тужби за клевета, на еден начин се врши негово заплашување и влијание, како сведок, што е казниво.
“Тужбата за клевета за исказ даден во судска потапка не е дозволена. Воедно, според американското законодавство, а и според членот 368-а од Кривичниот законик, казниво е влијанието врз сведоци во судска постапка. Целта е како ненадлежен суд да издејствува пресуда против мене, која би ја користеле да ја амортизираат мојата изјава во постапките што се водат во Њујоршкиот суд и во Обвинителството за организиран криминал во Македонија “, изјави Богоевски.
Тој објави документ од Комисијата за хартии од вредност на САД, кој го поткрепува неговото тврдење, односно дека не смее да одговара за изјава што ја дал во судски процес.
„Фокус“ неодамна објави дека овие два процеси требало да ги суди судијката Јованка Спировска -Панева, а не судијата Нухи Рустеми, бидејќи како што неофицијално дознававме, судијката била тргната од предметите.
Според информациите на „Фокус“, судијката Спировска- Панева одбила да ги почитува насоките кои наводно ги добила од претседателот на Основниот суд Скопје 2, Илир Сулејмани, поради што била сменета. За ваквите шпекулации одговор побаравме од претседателот на судот, одноно го прашавме дали е вистина дека и правел притисок на судијката, а кога не го послушала ја тргнал од предметот? Од судот ни одговорија дека претседателот никому не врши притисок и дека работи согласно законите.
Обвинетиот во случајот, Богоевски, пак ни потврди дека предметот најпрвин бил во рацете на судијката Панева.
Валентина Вурмо