Били Ѕвер стана пчелар: Наместо аплаузи, зуење на пчели

by fokus

Кавадарчанецот Илија Делов, кој што на јавноста и е познат како раперот Били Ѕвер, кој во 2010 година ја претставуваше Македонија на Евровизија заедно со Ѓоко Танески со нумерата ,,Јас ја имам силата’’ сосема се повлече од музиката.

Тој веќе неколку години наназад сосема е посветен на пчеларството и вели дека аплаузите на публиката ги заменил со зуењето на пчелите, и тоа му донело спокој и среќа во животот.

,,Сакам мирен и спокоен живот, а тоа го пронајдов во пчеларството. Музиката е внатре во мене, не сум ја исфрлил, но годините си го прават своето, кога си млад имаш други размислувања за животот. Сега работам со пчели заедно со моето семејство, уживам кога сум покрај пчеларникот и го слушам само шумот од пчелите кои безпрестано работат. Пчелите не се играчка, не може секој да ги одгледува, треба да имаш желба, љубов спрема нив…’’ – раскажува Били, кој што веќе имал над 200 кошници со пчели.

Дел од нив биле сместени на ливада во близина на Кавадарци, а пак останиот дел високо на Кожуф планина.

,,Сега за сега имам над 200 кошници и работам на нивно размножување. Не сум сконцентриран на голема количина на мед, повеќе работам на зголемување на број на кошници и производство на млади пчели, но од оваа година со Господ напред очекувам и мед и пчели во поголем број. Стотина кошници чувам во околина каде што има ливадска паша и багрем, додека останатите се на Кожуф, високо на планината, каде што произведуваме боров и дабов планински мед’’ – вели поранешниот рапер додавјаќи дека убаво може да се живее од продажба на мед и пчелини семејства.

По враќањето од Евросонг 2010, кој што се одржа во Осло, Норвешка, Били го издаде својот прв и единствен албум ,,Мацедониш’’ и сними многу спотови и дуети. Имаше настапи во клубови низ земјава и беше еден од најбараните рапери. Денес, живее во Кавадарци, посветен на сопругата и ќеркичката и вели дека не планира да им се враќа на настапите.

Вики Клинчарова
 

Поврзани новости