Барањата на едно од крилата на БЕСА, како услов за поддршка на уставните амандмани, се спротивни на Договорот од Преспа и можат да го срушат. Доколку предлогот на Биљал Касами биде прифатен од премиерот Зоран Заев, тоа ќе значи толкување на Договорот и негова имплементација која не би била прифатлива за грчката Влада предводена од Алексис Ципрас. Но што всушност значи барањето на Касами?
Како што веќе објавија медиумите, за Касами е дискутабилeн делот во уставниот закон што го регулира државјанството. Касами предлага амандман кој ќе гласи „За граѓаните од aлбанската етничка припадност, во прописите и другите акти на државните органи државјанството на македонски јазик ќе гласи „македонско/граѓани на Република Северна Македонија“, на албански јазик ќе гласи „e Maqedonisë/qytetar i Republikës së Maqedonisë Veriore“ и на англиски „macedonian/citizen of Republic od North Macedonia“.
Но зборот „e Maqedonisë“ во превод значи „на Македонија“, наспроти „Maqedonаs“, збор кој Касами го отфрла, а кој на албански има значење „македонски“, но и „Македонец“, поради што Беса тврди дека Албанците не сакаат етнички да се нарекуваат „Македонци“. Решението „е Maqedonisë“ („на Македонија“) би можело да биде проблематично за Ципрас и за грчката страна бидејќи преговарачкиот тим на Грција строго се противеше на употребата на зборот Македонија без географската придавка „северна“. Придавката „македонско“ за државјанството и „македонски“ за народот, е отстапка од грчката страна заради дополнителна заштита на македонскиот идентитет.
Со други зборови, амандманот што го бара Касами би можел да биде неприфатлив за Грција и владата на Ципрас да го отфрли, а со тоа и да не го ратификува Договорот во грчкиот парламент.
Утринава Заев е на нова рунда разговори со Касами како би се постигнало решение за проблемот. Седницата за уставните измени е закажана за во 12.00 часот, па партиските лидери се во трка со времето, или ќе се договорат или Џафери ќе мора повторно да ја одложи седницата.