Антиваксерите со тужби за директори, за дел од невакцинираните деца училишните врати останаа затворени

by Fokus

Дел од родителите чии деца оваа учебна година не се запишаа во прво одделение бидејќи немаат примено вакцини, поднесоа тужба во Управниот суд и кривични пријави против директори на две основни училишта од Скопје. Неформалната група „Здравјето на игла не влегува“ ги повикува на тужбата да се приклучат и други родители чии деца не се запишани во училиште бидејќи не се вакцинирани.

– За сите оние дечиња кои противзаконски останаа надвор од образовниот систем на државата денес, се покренува судска постапка пред надлежните судови на почеток за времена мерка, а после и приватни тужби до поединци од надлежните институции. Доколку сакате да учествувате во истата треба да го пополните полномошното (во 5 примероци) на сликата и да го испратите во посочената адвокатска канцеларија заедно со фотокопија од лична карта и 1.000 ден (за адвокатската услуга), се вели во повикот објавен на Фејсбук.

Адвокатот Звонко Давидовиќ кој е правен застапник на овие родители потврди дека до Управниот суд е поднесена една тужба од повеќе тужители како и две кривични пријави против директори. Директорите се од две основни скопски училишта.

-Според законот, основното обрзование е задолжително и затоа сметаме дека се кршат човечките права. Тоа што не е исполнет услов за запишување на децата во училиште може да има прекшочна пријава. Зарем во 21 век треба да создадеме единки кои не може да се описменат – вели Давидовиќ за „Фокус“.

Давидовиќ вели дека Министерството за здравство кое инсистираше на почитување на задолжителната вакцинација се меша во нешто што не е негова ингеренција.

Тој вели дека постои пресуда на Судот за човекови права во Стразбур каде поинаку се гледа на заштитата на човекови права.

-Многу прашања има тука што е јавниот интерес, што е приватниот интерес, а што е бизнисот со вакцини. Треба да се каже дека дел од училиштата ги примија децата, дел не. Тоа го покажува хаосот во кој се наоѓаме – вели Давидовиќ.

Откако беше прогласена епидемија на мали сипаници на територијата на цела држава и имаше неколку смртни случаи, беше донесена одлука да не се запишуваат во училиште и во градинка невакцинираните деца.

Поврзани новости