Ангелов: Груевски во 2002 година им го сврте грбот на „Лавовите“, денешна ЕБР

by fokus 10:40
10:40

Стојанче Ангелов, лидерот на Достоинство, потсетува дека во 2002 година, Никола Груевски, тогашен министер за финансии, ги оставил на цедило припадниците на единицата „Лавови“, од кои голем дел денеска се припадници на ЕБР. Еве што пишува Ангелов, во својот коментар наречен Лажниот патриотизам на Никола Груевски и „Лавовите“.

-Во 2002 година тогашниот министер за финансии Никола Груевски не дозволуваше припадниците на ново формираната полициска единица “Лавови“ да добијат решенија за работа во МВР иако како министер за финансии беше должен да потпише само формално одобрување за нивното вработување. Тогашниот Министер за внатрешни работи Љубе Бошкоски неколку месеци претходно ги имаше потпишано договорите за работа на “Лавовите“ но тие не можеа да се ефектуираат без потпис на министерот за финансии Никола Груевски.

- Advertisements -

Затоа, по директна вина на Никола Груевски “Лавовите“ иако повеќе од една година беа во редовите на МВР, иако поголем дел од нив учествуваа и во одбраната на државата во 2001-та, останаа со нерешен статус и по промената на власта кон крајот на 2002-та се најдоа во многу незавидна позиција.

Да биде иронијата поголема, во текот на 2003-та година во времето на тогашниот премиер Бранко Црвенковски, по неколку превириња сите “Лавови“ кои ги исполнуваа законските услови добија решенија за работа во МВР.

Подоцна “Лавовите“ беа козметички трансформирани и преименувани во “Единица за брзо распоредување“ (ЕБР) и како такви постојат до ден денес. Верувам дека повеќе од половината припадници на денешната ЕБР се поранешни “Лавови“ на кои Груевски во 2002-та не сакаше да им ги потпише решенија за работа, потсетува Ангелов.

Поврзани новости