Инспекторите биле во засилена контрола за време на продолжениот викенд, за да видат на терен дали се почитуваат мерките за заштита од корона вирусот, информираат од Владата.
-Инспекторите на Државниот пазарен инспекторат, Државниот инспекторат за транспорт, Државен трудов инспекторат и Управата за јавни приходи во текот на продолжениот викенд работат интензивно на терен и вршат контрола на начинот по кој се спроведуваат протоколите пропишани од страна на здравствените власти за заштита од конронавирусот КОВИД-19.
Државниот пазарен инспекторат денеска до 16:00 часот поднел 5 кривични пријави за непочитување на протоколот за работа на угостителските објекти во услови на КОВИД -19 од кои 3 во Струга, една во Пониква, Кочани, и една во Маврово. Исто така денеска инспекторите на Државниот пазарен инспекторат поднеле и четири прекршочни пријави за утврдени неправилности при работењето на угостителски објекти, велат од Владата.
Оттаму додаваат дека пазарните инспектори се во засилена контрола и во туристичките места во државата и вршат надзор на спроведувањето на владините мерки.
-Државниот инспекторат за транспорт од направените надзори денеска во Штип, Тетово и Велес не утврдил прекршувања. Констатирано е дека во целост се почитуваат владините уредби.
Од страна на Државниот инспекторат за труд се донесени 4 решенија и 3 укажувања на работодавачите за носење заштитни маски, заштитни ракавици, користење средства за дезинфекција, проветрување, ослободување на вработените од ризичните групи. Побарано е веднаш да почнат да се придржуваат кон препораките на Владата.
Инспекторите на Управата за јавни приходи на терен вршат контроли на прометот и дејствуваат едукативно, велат од Владата.