Министерот Венко Филипче на денешната прес конференција истакна дека кај уште седумина граѓани се проверува дали се заболени од корона вирус.
-Овие граѓани се од Штип, Куманово, Тетово, Кичево и Охрид. Дел од нив престојувале во Швајцарија, Австрија и Германија. Тоа се пациентите од Штип, Куманово и Кичево. После неколку дена од враќањето развиле висока температура, и сега се во одделите за изолација и во текот на денот ќе бидат готови резултатите. Понатаму, од Охрид еден пациент и две родилки, кои вчера се донесени од Дебар. Едната е донесена во болницата во Охрид, а другата е во Скопје. Тие се во стабилна состојба, рече Филипче.
Министерот појасни дека сомнителните случаи пред 3-4 дена дошле од странство, а денес добиле покачена температура. Според нивните кажувања, биле во самоизолација.
Бремените жени, како што рече министерот, не се непосредно пред породување, меѓутоа ќе се направат тестовите и да бидат спремни за породувањето.
Министерот истакна дека досегашните пациенти кај кој беше потврден корона вирусот се во добра здравствена состојба, меѓу кои и 15-годишното момче.
-Сите 13 пациенти кои се на инфективната клиника се во добра здравствена состојба. Само првата пациентка од Дебар е на респираторна машина со значително подобрување на параметрите, после прикклучување на механичката вентилација, но со се уште непредвидлива прогноза, рече Филипче, кој додаде дека сите останати се во добра здравствена состојба.