Во јавноста денеска стана актуелно дека црквите од Повардарската епархија почнале да наплаќаат за фотографирање и снимање на венчавки и крштевки. Оваа нова давачка е наменета за фотографите: 500 денари за фотографиите пред црквата и 1.500 денари за сликање и снимање во црквата.
„Фокус“ сакаше да дознае дали ова е вистина од владиката Агатангел, но одговор не доби. Кога владиката телефонски слушна за што станува збор, ни посака здравје и веднаш спушти, без да го дослуша прашањето.
-Да си жива и здрава, Господ здравје да ти даде, рече владиката Агатангел и го прекина телефонскиот разговор.
Фотостудијата од Велес за сајтот МКД потврдија дека црквата веќе почнала да им наплаќа за снимање и фотографирање, а владиката им рекол оти во сите цркви ќе мораат да плаќаат по 500 денари доколку сакаат да фотографираат, „така сакал Господ“.