Нема лекови за болните од хемофилија и за болните од ретката болест Вилсон поради вина на Советот за јавни набавки, кој е комплетно политизиран, рече министерот за здравство Арбен Таравари на денешниот отчет за 100 дена Влада. Тој истакна дека пред шест месеци Советот без проблем давал дозвола за набавките под исти услови како и сега, а сега ги враќа и ја влече постапката за да направи проблем.
„Иста фирма пред шест месеци поминувала и се правеле набавки, а сега ја враќаат процедурата. Не смееме да си играме со животот на пациентите. Каде што можевме, направивме интервентен увоз, но тоа секогаш чини повеќе. И премиерот го информирав за овој проблем и побарав да се најде решение. Лекови нема не затоа што министерот не сака да ја потпише набавката, туку исклучиво поради Советот за јавни набавки”, рече Таравари.
Пациентите со ретка болест Вилсон и хемофилија трет месец се без терапија, без која може да починат.